Sólbjörg Linda Reynisdóttir

Hvað er annað hægt að segja þegar ég hef staðið mig svo herfilega í blogg málunum. ...... og hvað er svo að frétta síðan síðast ?

1 Þorrablótið heppnaðist vel

2 Þurfti ekki rándýr gleraugu, sjónin í fínu lagi (systur til mikilla ama, þá getur hún ekki notað það á mig)

3 Tennurnar klárar á morgun til uppsetningar (ha ha ha, alveg satt)

 4 Önnur mál:  Vorið er komið og grundirnar gróa osfr. brumið farið að gægjast út á trjánum og ákveðið millibils ástand í gangi þ.e. svona flíspeysu veður.  Ég hef notað seinnipart veturs til að sanka að mér aukaforða, etið utan á mig nýtt lag.  Er að vona að það bráðni af hér í sumar og um leið held ég að ég hljóti bjartsýnisverðlaun Bröste.

Arnþór hefur það fínt og skólagangan gengur ágætlega þó hann kvarti yfir að Danir hlusti ekki á hann og þeir barasta horfi ekkert framfyrir sig og stími á alla og að ógleymdu aðal hneyksli hans að DANIR NOTA EKKI HJÁLM ÞEGAR ÞEIR HJÓLA.  Sem er náttúrulega ein af dauðasyndunum þegar maður er 6 ára og kemur frá Íslandi.  Annars tilkynnti hann mér um daginn að hann ætlaði ekki að verða pabbi þegar hann yrði stór ! því þá þyrfti hann nefnilega að skeina barninu sínu og það lætur hann ekki bjóða sér.  Það er því allt útlit fyrir að ég verði ekki amma í framtíðinni.  Svo má ekki gleyma fyrstu medalíuni sem hann fékk á síðasta handboltamóti, honum finnst hann vera "on the top of the world" og er oft með hana um hálsinn hér heima við.  Hann stefnir á að fá fullt af þeim til að vera eins klár og Bjarki Már frændi sem á meira að segja bikar.... það er fátt sem toppar það.

Af mér og mínum málum er það að frétta að ég var á námskeiði hér að læra að gera atvinnuumsókn og ferilskrá (ekki seinna vænna fyrir fyrrverandi starfsmannastjórann).  Sjáum svo hvort ég fái vinnu þar til skólinn byrjar 1.sept.  Stefni á diplóma nám í fullorðinsfræðslu og fræðslustjórnun sem tekur eitt ár (30 einingar).  Svo er að sjá hvort þá sé ekki bara komin tími til að luntast heim til sín og segja þetta gott !  Tíminn leiðir það í ljós, kannski kynnist ég dönskum draumaprinsi sem tefur heimkomu mína. Mér skilst að þeir geti bara bankað upp á eða jafnvel liggi undir rúminu hjá manni einn daginn þegar maður á síst von á því !

Ætla að enda skrif mín á gullkorni frá hinum mjög svo VIRKA syni mínum "Ég nenni sko ekki að vera dauður (nú hvað meinaru?) jú af því þegar maður deyr þá breytist maður í engil og ég nenni sko ekki að vera passandi alla og vaka yfir þeim á nóttuni"

Lífið er dejligt nú, sólin skín á frostna jörð, kaffið er gott í nýja flotta bollanum mínum og lestri á Nyhedsavisen lokið.  Það er ótrúlegt hvað dananum tekst að leika sér með tungumálið og segja skemmtilega frá.  Eins og t.d. í greininni þar sem er verið að segja frá nýútkominni tölfræðiskýrslu hér í landi.  Fyrirsögnin er "mörg dönsk svín og of lítið kynlíf" þar segir að við (danir) búum til of fá börn, keyrum í of stórum bílum og sendum massa af sms og á meðan standa 13 miljón svína og fylgjast með....... í janúar 2006 gengu 5.427.459 manneskjur um á þeim 43.098 ferkílómetrum sem danskt land er en á meðan nutu 13 miljón svína lífsins í stíum sínum.

Snilldarlega sagt frá þessum niðurstöðum.

Já það er nú svo, gott að ég fékk viðbrögð frá fjölskyldunni vegna verksmiðjugallans.  Bróðir er öllu raunsærri en systir sem enn lifir í afneitun

Annars eru þetta smáaurar sem ber ekki að hafa áhyggjur af, eins og sumir segja peningar eru afstætt hugtak.  Tannlæknirinn gaf mér tilboð sem hljóðaði upp á 13.000 dkr........iss piss.

 Lífið gengur annars sinn vanagang hér í Danmörku.  Við mæðginin fórum á handboltamót á laugardagsmorgni þar sem drengurinn keppti 4 leiki og stóð í markinu allan tímann.  Það gladdi móðurhjartað að sjá hann þarna á milli stanganna og ég stóð mig að því að hugsa hvort hann hefði erft markmanns hæfileikana sem móðurbræður hans hafa.  Ég spurði hann svo eftir mótið af hverju hann hefði verið í marki, svarið var einfalt "þá þarf ég ekki að vera úti á velli".  Þannig ég veit ekki hvort hæfileikarnir séu til staðar eða hann svona latur.  Nema þetta sé ástæðan fyrir því að spilarar velja sér markið til að standa í ??????

Þennan sama dag fórum við svo á MGP hátíð í eftirskólanum (melody grand prix) frábært framtak hjá starfsfólkinu.  Fyrst var hæfileika keppni, 18 atriði og svo kínverskt hlaðborð og loks alvöru diskótek með ljósasýningu, reyk og öllu tilheyrandi.  Hátíðin stóð yfir frá kl. 17-23.  Arnþór skemmti sér konunglega eins og hinir 330 gestirnir, sem voru á öllum aldri.  Börnin 6,7 og 8 ára og foreldrar og systkini.  Mér fannst skondið að hægt var að kaupa sér öl eða léttvín, þessi drykkjumenning er svo frábrugðin hinni íslensku.  Það þætti saga til næsta bæjar ef áfengi væri á barnaskemmtun á fróni. 

Annars erum við heima í dag og í gær, Arnþór orðin veikur enn eina ferðina, hiti og höfuðverkur.  Sem betur fer var ég búin að kaupa pússluspil svo seinniparturinn í gær var nýttur í púsl.  Okkur fannst það skítlétt, bara 500 stykki og fórum langt með að klára það á einu kveldi.  Íbúðin að fyllast af pússluspilum, komin með 5 listaverk með 1000 púslum.  Var að spá í að ramma þetta inn og halda sýningu fyrir vinina, kannski ég geti selt þau.  Þá er ég komin með upp í viðhaldskostnaðinn

Betra seint en aldrei.  Nú ætla ég að fara að skrá danska lífið niður, byrja ekki á byrjuninni heldur núinu.

Dagurinn leið við leik og söng.... eða ekki.  Þurfti að fara til heimilis læknis í dag, guð minn góður hvað honum finnst leiðinlegt í vinnuni, eða er það kannski ég sem kalla fram þessa þurru hegðun hjá kallinum.  Hann er nú ekki alveg að skilja hvað ég sé að vilja hér í landinu, ég fer ekki í námið fyrr en í haust og ég er bara að chilla.  Hann er ekki einn um að skilja þetta ekki, daninn verður doldið hvumsa þegar ég segist hafa flutt hingað til að kynnast landi og þjóð.  Maður nebblega gerir ekki svoleiðis hér, að selja íbúðina sína og draslið og flytja bara í eitthvað annað land til að læra málið.  Alger peningaeyðsla og óþarfi, úff það verður ákveðin léttir þegar námið byrjar þá er ég allavega orðin lögleg eða gild í samfélaginu.

 Ótrúlegt hvað dagsformið hefur mikið að segja varðandi að tala dönskuna, í dag var ég eins og málhaltur krakki á meðan krakkinn á heimilinu söng og talaði við sjálfan sig á hrikalega flottri dönsku.  Stundum er ég 6 ára en ekki hann.

Á morgun ætla ég að tala flotta dönsku þegar ég fer út í búð að kaupa mér nýtt púsluspil, það fjórða í röðinni (með 1000 púslum) svo ætla ég að rúlla dönskunni upp þegar ég hringi til að vesenast í nettengingunni hjá mér.

Já það er gott að hafa markmið.